माम्री र दुध,मही र मकै खाएको मजानै अर्को
*********************************
माम्री र दुध,मही र मकै खाएको मजानै अर्को
"अल्छे ले पो माम्रीभात खान्छ"
भन्नु हुन्थ्यो आमा
अल्छेनै सही
माम्री र दुध मही र मकै खाएको मजानै अर्को
धिउमा भुटेका फर्सीको मुन्टा
गुन्द्रुक र सिन्कीको अचार
गोलभेडाँको चटनी
तामाको आचार
तिलको अचार र सेलरोटी जति खाए पनि
माम्री र दुध मही र मकै खाएको मजानै अर्को।
सोल्लर र पाकेको फर्सीको स्वाद
ह्वाम्म ह्वाम्म खान्थ्यो अन्तरे
"भोक मिठो कि भोजन मिठो"
भन्नु हुन्थ्यो हजुरबुबा
मासको दालमा अदुवा हालेको
तर जति जे भने पनि
माम्री र दुध,मही र मकै खाएको मजानै अर्को।
आज धिउ खारेको दिन
नौनी धिउ र खारेको घिउ
रोजेर खान पाइन्छ यता
तर बाछालाई डाले घाँस काट्न पर्छ नि?
घिउ र भात जति खाए पनि
माम्री र दुध,मही र मकै खाएको मजानै अर्को।
ढकने पाक्यो लौ
टन्न खाएर बाख्रा चराउन जान्छ कान्छो
दिनभरि भोकनै लाग्दैन अब
अलिकति चिउरा पनि लिएर जान्छ
दही चिउरा जति खाए पनि
माम्री र दुध,मोही र मकै खाएको मजानै अर्को।
आँप र मुलाको थेबे,रायको साग,निगुरो र बेतको टुसाको
स्वादनै अर्को
तिता फूलको अचार
भेकुर गुटिको चटनी
औटेँगाको झोल जति खाए पनि
माम्री र दुध,मही र मकै खाएको मजानै अर्को।
मकै मात्रै खाएर जिउँदो रहेको उदाहरण छ गोर्खालीको
काम गर्छ,गरेर खान्छ,माग्दैन भिक्षा
जंगलमा पाउने नानाथरी खान जान्दछ ऊ
थोरैमा रमाउँछ ,सबैको प्यारो बन्छ
जिउने कला तमाम जान्दछ
थोरै खान्छ,घेरै गर्छ
माम्री र दुध, मही र मकै खाएको मजानै अर्को।
पुरुषोत्तम उपाध्याय दाहाल
गुवाहाटी , आसाम
10/11/22
तिता फूल:आसाममा खाने चलन भएको एउटा बोटको रातो फूल।अलिक तिती हुन्छ
बेतको टुसा:यता पाइने बेतको टुसा तितो तर सारै मिठो।पोलेर र भुटेर खाइन्छ।
औटेंगा: ठुलो रुखमा फल्ने गोलो आकृतिको अमिलो/टर्रो
स्वादको।
भेकुर गुटी:स्यानो गोल मरिच भन्दा अलिक ठुलो।सारै तितो
( पूर्व आसाममा)अचार खाइन्छ ।
