मलाई एउटा बास्ने भाले कुखुरो चाहिएको छ
********************************
हिजो आजको घडीले प्रहर भन्न जान्दैन
सुनेको भए पो! प्रहर जान्ने बस्तु जरुरी भएको छ
प्रथम कुखुराको डाकमा आमा उठ्नु हुन्थ्यो
दोस्रो कुखुराको डाकमा बाबु उठ्नु हुन्थ्यो
म सुतुवा कुम्भकर्ण भएको छु
प्रहर प्रहर मा बास्ने,कुखुरी काँ गर्ने
मलाई एउटा बास्ने भालेकुखुरो चाहिएको छ।
अब फेरि ल्याउनु कसरी होला
लुकाएर ल्याउनु कि पेरुङ्गामा हालेर
देखने छन् सबैले रातो भाले
आम्मै! "गुरुबाको छोराले भाले ल्यायो" भन्लान्
दोधार मा छु म कठै!
सारै खाँचो भएको छ प्रहर प्रहरमा बास्ने भालेको
मलाई एउटा बास्ने भालेकुखुरो चाहिएको छ।
धढीको अलराममा प्राण नै छैन
भालेको जस्तो परवाट जीवन्त स्वरको।
भाले चारैतिर घुमी घुमी बास्छ
उस्को स्वरको तरङ्ग हुन्छ धरालमा
घढी त निष्प्राण स्वरको फगत एउटा वस्तु न हो
तर
भालेको डाकले सम्झाउँछ प्रत्येक प्रहर
मलाई एउटा बास्ने भालेकुखुरो चाहिएको छ।
फेरि भाले एक्लै नबस्ला
साथी त सबैलाई जरुरी हुन्छ
उस्को साथी पोथीपनि एउटा जरुरी हुन्छ सायद
नत्र नबसला उ एक्लै
दुःख छ हौ मलाई
कसो गरौं होला
बाहुनले कुखुरा पाल्यौ भन्लान् फेरि
भालेको डाकमा उठ्ने बानी लगाई गए बुबा आमा
घडी त त्यसबेला हुनेखानेको घरमा मात्रै हुन्थ्यो
मलाई एउटा बास्ने भालेकुखुरो चाहिएको छ।
अब भाले- पोथी भए पछि खोर बनाउनु पर्ला
चारो समय समयमा दिनु पार्ला
अहो!पोथी अाेथरा बस्ला फेरि
अण्डा पार्ला ,चल्ला पार्ला, हुर्काउला
चीलले चल्ला लैजाला
चल्ला छोप्ने डोको चाहिएला
तमाम विपरीत परिस्थिति भए पनि
मलाई एउटा बास्ने भालेकुखुरो चाहिएको छ।
समस्याहरू आउलान् निकै तर पाल्छु पाल्छु
कुनैदिन मेरो फाैजी बाल्यसखा घिसिङ कान्छा आउला
ए कुखुरा पलिछस त "बाहुन काठा"राम्रो गरिस भनेर भन्ला
लौ रातो भाले काट रमसँग खानु पर्छ भन्ला
मैले भाले बास्नपो राखेको भन्दा
"बौलाएको त छैनस हौ समय डाक्ने घडी छ त"भन्ला
नमान्ला उ अन्तमा पोथी ले नै काम चलाउनु पर्ला
फेरि एक्लो भाले यो बैँशमा बस्न नमानला
मलाई एउटा बास्ने भालेकुखुरो चाहिएको छ।
छाेरी आउली फेरि मधेशवाट निकै वर्षमा
"सबै वैष्णव छन् हाम्रो घरमा"
भनेर गुनासो गर्ली
भाले नखाको निकै वर्ष भयो बाबु भन्ली!
काट्नु न भाले खाउ भने पछि के लाग्यो र
सारै दुःख परेको छ हौ मलाई
धर्म संकटमा छ यो अन्तरे
मलाई एउटा बास्ने भालेकुखुरो चाहिएको छ।
अब तीनचारवटा भाले पो पाल्नु पर्छ ठानेको
"हुँदैन जुधेर मर्छन भाले भाले "
भन्छ मेरो वाल्य साखा तमाङ माइलो
विकट स्थितिमा परेको छु हौ म त
तर प्रहर प्रहरमा डाक्ने भाले जरुरी छ मलाई
मलाई भालेको डाकमा नै उठ्नु छ
किंकर्तव्यविमूढ़ भएको छु म हजुर!
मलाई एउटा बास्ने भालेकुखुरो चाहिएको छ।
पुरूषोत्तम उपाध्याय दाहाल
गुवाहाटी आसाम
७/४/२२
