আপোনাক ঘৰ চলাবলৈ কিমান টকা লাগে ডাঙৰীয়া!
*********
আপোনাক ঘৰ চলাবলৈ
কিমান টকা লাগে ডাঙৰীয়া ?
কিয় নোজোৰে আপোনাক টকাৰে ?
আনে কেনেকৈ আনন্দেৰে
গৃহস্থী চলাই আছে
যিমান পায় তাৰেই আৰামত ঘৰ চলায়
কিছু টকা নামঘৰত দিবলৈও জোৰে;
আপোনাক ঘৰ চলাবলৈ
কিমান টকা লাগে ডাঙৰীয়া ?
শঙ্কৰ গুৰুৱে দিয়া সন্তুষ্টিৰ জ্ঞান
আপুনি বিদ্যালয়ত পঢ়া মনত নপৰেনে ?
নিশ্চয় মা-দেউতাই আৰু গুৰুৱে
জ্ঞান দিছিল সতভাৱে ৰাজসেৱা
কৰিবলৈ
ৰাইজৰ কাম কৰিবলৈ;
আপুনি শপত খাই কামত যোগদান কৰিছিল চাগৈ
কিন্তু এতিয়া আপুনি কি কৰিলে মান্যবৰ ?
আপোনাক ঘৰ চলাবলৈ
কিমান টকা লাগে ডাঙৰীয়া ?
আপোনাৰ পিতৃ-মাতৃ
বাঁহ-খেৰৰ ঘৰতো আনন্দেৰে আছিল চাগে,
বিচৰা নাছিল চাগে পকীঘৰ;
আধ্যাত্মিক জ্ঞানেৰে ভৰাই তোলক হৃদয়,
টকাৰে নাপায় আনন্দ -
ই ক্ষন্তেকীয়া
বিশাল আকাশৰ পৰা আপোনাক
চাই থাকিবলৈ ঈশ্বৰ এজন আছে,
বিশ্বাস কৰক
লোভেই পাপ, পাপেই মৃত্যু ।
আপোনাক ঘৰ চলাবলৈ
কিমান টকা লাগে ডাঙৰীয়া ?
বিষাক্ত হৈছে ধৰাতল
আজিয়েই প্ৰণ লওক
"যিমান পাম তাতে সন্তুষ্ট হ'ম
লাগিলে ভিক্ষা কৰিম
কিন্তু ডুব নিদিওঁ ভ্ৰষ্টাচাৰত ।
পাৰিলে দুখীয়াৰ উপকাৰ কৰক;
আপোনাৰ কৰ্মক ৰাইজে ধিক্কাৰ দিছে,
টকাৰে আপুনি মৰ্যাদা কিনিব নোৱাৰে, মান্যবৰ !
আপোনাক ঘৰ চলাবলৈ
কিমান টকা লাগে ডাঙৰীয়া ?
*****
পুৰুষোত্তম উপাধ্যায়
গুৱাহাটী।
৫/৯/২০২৩
(বিশেষ ধন্যবাদ:শ্ৰদ্ধাৰ শ্ৰীযুত অতুল চন্দ্ৰ শৰ্মা)
