गोठको वधु विज्ञापन
****************
डोको बोक्ने, थुन्से बोक्ने,घाँस काट्ने चाहियो
ताक परे रुख चड्ने बयर टिप्ने, चाहियो
बियाड रुङदा गुलेलीले उफ्री उफ्री चरी खेद्ने
अल्छी लाग्दा कहिले काँही बाघचाल खेल्ने चाहियो।
नदीमा गै थ्याच्च बसी लुगा धुने चाहियो
परालको तेन्द्रा लिई गुन्द्री बुन्ने चाहियो
लागो लाग्दा कुद्दै कुद्दै धामी डाक्न आँट गर्ने
टाउको दुख्दा फूलतेल लाउने दर्हो हात चाहियो।
दुःख पर्दा ढिंडो खाने बलियो मन चाहियो
चोर डाका आईपरेमा खुकुरी बोक्ने चाहियो
दुधको तर, तोरी तेल,मास लगाई श्रृंगार गर्ने
एउटा मुटु एउटा मन भएकी नै चाहियो।
छड्के नजर लाउनेलाई मुक्का मार्ने चाहियो
ढिकी कुटी चिउरा पार्ने दर्हो गोडा चाहियो
अभर पर्दा मात्रै मात्र माइत जान ईच्छा गर्ने
चौबन्दीको तुना बाँधने नरम हात चाहियो।
नदी खोला तर्न सक्ने पौडी खेल्ने चाहियो
धान रोप्ने,बीउ काड़ने हिलो खेल्ने चाहियो
कुटे लिई सब्जी गोड्ने खोस्रिने हात भए राम्रो
कीर्तन गर्दा ढोल मञ्जिरा घन्काउने चाहियो।
*****
पुरुषोत्तम उपाध्याय दाहाल
गुवाहाटी , आसाम
१३/६/२०२३
