कस्तो सपना!
**********
झरि र वादल साथै चट्याङ पनि
निदाएछु भुसुक्कै
देखेछु सपना:
माथि मञ्चमा सबै कविहरू विराजमान
नारी र पुरुष स्रष्टा
तल
देश चलाउने सबै राजनेता,
छर्लङ्ग पारे सबै देशको चित्र कवितामा
बिलकुल बजेन ताली तलावाट
गुन्ज्यो ताली माथिबाट
दुई - चार नेताले ताली बजाए हुलमा
अरुले आँखा तर्काए उनीहरूलाई।
गरिबीको उन्मूलन गर्ने ठुलो परिकल्पना
लोकार्पण गर्न छ भन्दै
हिँडे सबै नेताहरु आ - आफ्नो कारमा
यता कविहरु
काव्यसन्ध्या सकेर
पैदल नै लागे बस स्टेण्ड तिर
झसङ्ग विउँझिए
आज आकाश उज्यालो छ
सायद शुभ सङ्केत होला
देश विकासको।
सुन्दैछु मेरो साथी बिर्खे
बिहानै चाम्रेभात र गुन्द्रुकको अचार खाएर
आईतबारे पशु बजारमा
गएको छ रे चारदाँते
हलगोरु किन्न।
*****
पुरूषोत्तम उपाध्याय दाहाल
१५/५/२२
