रहर ( ७)

 रहर ( ७)

****

कतिहो कति अनन्त रहर

जंगलमा गएर बिमिरो टिप्ने रहर

बिमिरो साँधेर खाने रहर

खागोको मह काडने रहर

बडेरोको टुसा ल्याउने रहर

निगुरो टिप्ने रहर

कतिहो कति अनन्त रहर।

सिमलको रुखमा बसेको बरटुकुला हेर्ने रहर

सिनो खान आउने राजा गिद्ध हेर्ने रहर

फिस्टो चरीको त्यो राम्ररी बुनेको गुँड हेर्ने रहर

तामे ढुकर र सिमकुखुरा पनि हेर्ने रहर

तामूलको रुखमा तारे चराको गुँड हेर्ने रहर

कतिहो कति अनन्त रहर।

बनढ़ाडेले तमाङबाको कुखुरा लगेको हेर्ने रहर

गुलेलीले उस्लाई मटेंग्रा हानेको हेर्ने रहर

सुगाको हुल रात्रि बासझाँगमा बास बसेको हेर्ने रहर

साइँला दाईले हलसारो भैंसी दुहेको हेर्ने रहर

बुबाले बाँसको कलमले चिना लेखेको हेर्ने रहर

कतिहो कति अनन्त रहर।

चखेवा जोडी रमाएको हेर्ने रहर

जोडी ढुकुरले प्रेम आलाप गरेको हेर्ने रहर

बकुल्लो को हुल बेलुकि घर फर्केको हेर्ने रहर

घोडाले जोर लात्ती हानेको हेर्ने रहर

जन्तरे बा दुवै श्रीमतीसँग सँगै बसेको हेर्ने रहर

कतिहो कति अनन्त रहर।

खोलामा बल्छी मार्ने रहर

खत्री दाजुले ढिकी कुटेको हेर्ने रहर

आमाले घान लगाएको हेर्ने रहर

बिहेमा भुइँमा बसेर मासुभात खाने रहर

राति आकाशमा धुब्रतारा हेर्ने रहर

डल्लीको गाजलु आँखा हेर्ने रहर

कतिहो कति अनन्त रहर।

********

बरटुकुला =(हाडफोरा )

पुरूषोत्तम उपाध्याय दाहाल

पटना एयरपोर्ट, पटना, बिहार

३१/५/२२