बज्र
***
दसैंमा आएको हुण्डरीमा
चट्यांड पर्यो झुप्रे घरमा
त्यो पनि विधवा वृद्ध
खत्रिनि आमैको घरमा
बज्रले एक लैनो गाई
दुई खसी ठहरै भए
अब के बेचेर दसैं टार्नु होला हरे!कठै!
सारा गाउँमा बज्र परेझै भयो
नेताहरू आएर "चिन्ता नगर्नु आमै" भने!
"प्रकिति लगायत कसैलाई विश्वास नगरेस है अन्तरे "
भन्नु हुन्थ्यो हजुर बा।
सुकेका छन् आँसु मेरा फगत छ जिन्दगी आज
लुकेका छन् आँसु मेरा आघात छ जिन्दगी आज
सुखो परेली भएर पनि झिमकिन्छन आँखा मेरा
रुझेका छन् आँखा मेरा व्याघात छ जिन्दगी आज।
अन्तरे दाहाल
गुवाहाटी
३/१०/२२
शब्द भेटिन
*********
बाबु!
तिम्रो औंलाको ठेउला देखेर केही लेख्न
शब्द भेटिन
कति बन्चरो ,कोदालो र खुकुरी चलायौ!
आमा!
तिम्रो टाउकोमा नाम्लोको त्यो दाग देखेर
केही लेख्न
शब्द नै भेटिन
कति डोको र थुन्से बोकेऊ होला
काकाश्री:
तिम्रो त्यो घामले डडेको कालो अनुहार देखेर
कोर्न केही शब्द भेटिन
कति घाम पानी सहेऊ होला!
जन्तरे दाई !
यो उथ्थान पतनको लहरमा
मही र मकैको भात खाएर
फर्सी र घाङ्ग्रा उसिनेर खाएर बिताएको रात।
फुपू:
माइतीले दिएको बुलाकी बेचेर
फुपाजुको उपचार गरेको
झलझली याद आउँछ
ईश्वर:
दर्शन भएन हजुरको
आस्थामा नै रह्यौँ हामी
छोडिनौ धर्म
त्यसैले त आज उधार लिएर
हामी तीर्थयात्रामा
अब तिर्थेभोज गर्दा पनि
ऋण नै लिनु पर्ला सायद!
यतो धर्मः ततो जयः
अन्तरे दाहाल
गुवाहाटी
२४/९/२२
टिङ टिङ
*******
टिङ टिङ
दैलो खोल्यो पेपर वाला
टिङ टिङ
दैलो खोल्यो दुध वाला
टिङ टिङ
दैलो खोल्यो काम वाली
टिङ टिङ
दैलो खोल्यो जमेटो वाला
टिङ टिङ
दैलो खोल्यो पीजा वाला
टिङ टिङ
दैलो खोल्यो फ्लिपकार्ड वाला
टिङ टिङ
दैलो खोल्यो एमजन वाला
टिङ टिङ
दैलो खोल्यो लुगा प्रेस वाला
टिङ टिङ
दैलो खोल्यो अनलाईन ग्रोसरी वाला
टिङ टिङ
दैलो खोल्यो कुडा वाला
बस अब टिङ टिङमा बाँधिएर रह्यो जिन्दगी
अन्तरी म बस्न सक्दिन सहर
बरु गोठैमा आनन्द
ब्रह्मपुत्रको किनार
चिसो हावा
प्रफुल्लित मन
चराउँछु गाईवस्तु
रमाउँछु उतै
गाउँछु प्रेमगीत
पढ्छु गुणरत्नमाला
सुसेली मार्छु
सिटी बहाउँछु
खुब रमाउँछु।
टिङ टिङ
दैलो खुल्यो
अन्तरे हिँड्यो।
अन्तरे दाहाल
गुवाहाटी
१८/९/२३
आमाको हात बन्द भएको छ
*********************
सुन्नु न बडीबाबु
आज किन आउनु भएको
अब कसले पकाएर खान दिन्छ
आमाको हात बन्द भएको छ।
अस्तिनै आउनु पर्थ्यो
किन ढिलो गर्नु भएको
बाबुले राम्ररी पकाउन जान्नु नै हुन्न
अब के खानु हुन्छ
आमाको हात बन्द भएको छ।
जाउँ फुपू घरतिर
छेवैमा छ
उतै बसौं
उतै खाउँ
मिठो पकाउनु हुन्छ फुपूले पनि
बुझ्नु भयो नि
आमाको हात बन्द भएको छ।
भन्दै गई ऊ
सुन्दै गयौं हामी
पाँच वर्षकी नानु
मानौं हामीले नजानेको
नसुनेको अनन्त कथा
रहस्य नै उद्भावन गरे झैं
नबिराई भन्दै गई।
पुनर आउनु ल
आमाले राम्रो पकाउनु हुन्छ
म सानी छु
पकाउन नै जान्दिन
आमाले दिनुहुन्न केही गर्न
आमाको हात बन्द भएको छ!!!
(पहिलो पटक कान्छासँग भेट हुँदा उसको सानी
छोरीले पुग्ने साथ सुनाएको हृदय छुने एक अव्यक्त कथा)
अन्तरे दाहाल
कोक्राझार, आसाम
२०/९/२२
चिठ्ठी आयो
*********
बाबुलाई पैसा मांगेर लेखेको चिठ्ठी
आमाले बर्मा मावला पठाउनु भएको चिठ्ठी
दाजुले भाइलाई राम्ररी पढेस् भनेर लेखेको चिठ्ठी
बुबा आमा दुई मैनाको तीर्थयात्रामा जाँदा
विभिन्न ठाउँ ठाउँ वाट
पठाएको कुशल भएको पोस्ट कार्ड
अहा! दिनहरू गए बितेर!
अदालत वाट आएको पत्र
जागीर भएको सूचना पत्र
धागोले बेरेको दुःखद पत्र
टिकट नभेटेर पठाएको त्यो बेरङ्ग पत्र
नववर्षको शुभकामना कार्ड
हुलाक वाट आएको
फौजी भर्तिको पत्र
डल्लीले पठाएको प्रेम पत्र
हर्केले भेटेको प्रेम पत्र
त्यो रातो ढ्वाङ सारै प्यारो
हराउँदै जाँदैछ पत्र पेटी
मोबाइलमा बन्द भएको छ
प्रेम,सूचना साथै अनन्त कथा।
जन्तरे बा,खन्तरी आमै
कान्छा गोदार,गोठालो माइला
साइँलो झाँक्री, काईलो माहाजन
सबै मोबाइलमा व्यस्त
डाँक अस्त व्यस्त।।
*****
अन्तरे दाहाल
२७/८/२२
जयतु भाषा जननी
**************
जङ्गलमा दाउरा लिन जाँदा बोलेको त्यो भाषा
हलो जोत्दाको हलगोरुसंग बोलेको भाषा
कोक्रोमा नानी सुताउँदा बोलेको भाषा
धामीले जोखना हेर्दा बोलेको भाषा
धान रोपाइँमा बोलेको भाषा
गोठमा बोलेको ठेट भाषा
बीमारी हुँदाको भाषा
सीलोकेको भाषा
भव्य हाम्रो भाषा
अहा हाम्रो भाषा
प्यारो भाषा!
विश्वको सबै भाषामा महानतम हाम्रो भाषा।
प्राण नै हाम्रो भाषा
जयतु भाषा जननी!
(सम्पूर्णमा भाषा दिवसको शुभकामना)
****
अन्तरे दाहाल
२०/८/२२
बाँकी सब ठीक छ
*************
हिजो राति मथुरे गोरु हरायो
कान्छी गाई पनि थाक्यो
लिंडे कुकुर बिरामी भएको छ
बाँकी सब ठीक छ
आमाको बरखी आएको छ
बाबुको श्राद्ध पनि आउन लाग्यो
भदौ लागि सक्यो, बारी बाँझै छ
बाँकी सब ठीक छ
बारीमा नाम सब्जी छैन
बाँदरले सबै स्वाहा पारे
किनेर खानु पर्छ सब्जी ,बाँदर रुङ्गाई चलेको छ
बाँकी सब ठीक छ
हिजोआज बिजुली छैन
गर्मीले हाल बेहाल छ
टावर नाआएको निकै दिनपो भएको छ
बाँकी सब ठीक छ
चाडबाड आयो भन्छन नानीहरू
खसी दुईटा बेच्नु परेको छ
लुगाफाटा किनिदिनु परेको छ
बाँकी सब ठीक छ
सालीको विहेपो आएको छ
धरबुढीको एउटा खुट्टा माइत तिरै छ
श्रृंगारको समान किन्ने मेरो भागमा परेको छ
बाँकी सब ठीक छ
झसङ्ग विउँझिन्छु निद्राबाट कहिले कँही
मन बिरहले विचलित भएको छ
परेलीमा निकै सपनाहरूकोको ओइरो छ
एउटा आँखाले अर्को आँखालाई सोध्छ
के हालखबर छ सखा ?
झिमिक्क पार्दै अर्को आँखा भन्छ
म तिमीलाई देख्दिन?
बाँकी सब ठीक छ।
अन्तरे दाहाल
गुवाहाटी, आसाम
१८/८/२२